مکین بن کے ملے یا مکان بن کے ملے
کسی بھی طور ملے پر جہان بن کے ملے
زمیں کو چاروں طرف سے وہ جیسے گھیرے ہے
اسی طرح سے کوئی آسمان بن کے ملے
نبھائے کیسے بھلا اب وہ ساری دنیا سے
اسے تو جو بھی ملے جسم و جان بن کے ملے
ہاں ناخدا پہ بھروسہ کبھی نہیں کرتے
برا ہے کیا جو کوئی بادبان بن کے ملے
یہ میری شرط بتا دے تو آئینے کو بھی اب
اگر ہے ملنا ہمیں خوش گمان بن کے ملے
کہ اب نہ اہلِ چمن یوں کریں ذکر میرا
کہ سانس سانس جسے امتحان بن کے ملے
چلو بہار کا اس بار بیج یوں بوئیں
کہ صحرا صحرا ہمیں گلستان بن کے ملے
کہاں تلک میں ہی گاؤں گا گن ترے دنیا
کوئی ہمیں بھی تو اردو زبان بن کے ملے
یہی اب آخری خواہش ہماری ہے ابرک
کوئی ہماری ہمیں داستان بن کے ملے
........۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
Comments
Post a Comment